Escultura

Ao chegar a Santiago de Compostela polo Monte do Gozo, no barrio de San Lázaro, o peregrino atópase coa Porta de Europa, unha escultura de granito e bronce que mide 17 metros de alto.
Nela aparecen vinte persoas que, dun xeito ou doutro, axudaron a dar a coñecer o Camiño de Santiago, tamén chamado a Rúa Maior de Europa.
Cada peregrino é recibido coa man en bronce do artista que a fixo, como un saúdo de benvida á cidade.

A escultura "O Templario Peregrino" (1999), única no mundo, é obra do escultor Santiago de Santiago. Esta estatua atópase nun pequeno parque, seguindo o Camiño de Santiago. A obra representa ao espírito do Camiño, simbolizando a figura do peregrino templario.

Galería de arte na que podemos admirar curiosas obras de canterías deste escultor (falecido en xuño de 2025) que foi discípulo de Asorey.

Leopoldo Nóvoa foi outro dos artistas que contribuíu a facer do parque de San Domingos de Bonaval o complemento ideal do Centro de Arte Contemporánea para consolidar o ecosistema CGAC. O Espazo Crómlech Ocupado colocouse en 1998 no prado dos Campos Novos.

En Santiago de Compostela hai un monumento dedicado a Pablo Iglesias Posse, situado na cidade como homenaxe ao fundador do PSOE e a UXT. A escultura representa a Iglesias emerxendo de entre unha multitude en marcha, simbolizando a súa orixe popular e o seu papel como líder do movemento obreiro español.

O poeta visitou Compostela en varias ocasións e tivo coa nosa cidade un idilio que floreceu nos Seis poemas galegos, que serían publicados en 1935. Anos antes, en 1932, tiña estado en Santiago coa compañía teatral La Barraca; de aquela estancia consérvase unha foto que mostra a Federico nas escaleiras da Quintana; así o retrata aquí o escultor Álvaro de la Vega, coa mesma funda azul do grupo teatral e un xesto cordial. A peza mira a Rosalía, cumprindo simbolicamente o desexo do escritor de facer unha homenaxe á poetisa e levarlle unha camelia branca. Unha árbore de esa variedade foi plantada preto.

No paseo da Ferradura do parque da Alameda de Santiago atópase esta bonita estatua dedicada á poetisa galega Rosalía de Castro. Trátase dunha escultura feita en granito, que está datada en 1917 e cuxos autores son Isidro de Benito e Francisco Clivillés.
A escultura ten diversas placas: da Unidade Galega de Nova York dedicada á "cantora do pobo galego", do Centro Santiago de Compostela de Bos Aires (1934), da Peña Galega Manuel Murguía de Santa Fe (1959), do Centro Galego de Porto Rico (1965) e de Cantigas e Agarimos (1971), entre outras.
O enclave no que se atopa é idílico pola súa abundante vexetación e vistas da Catedral e do Campus Sur universitario.

O pintor Carlos Maside pasou gran parte da súa vida en Santiago de Compostela, onde morreu e onde está enterrado. Desde 2021 conta cunha homenaxe no corazón da cidade: unha escultura na súa honra no Paseo dos Leóns da Alameda. Unha fotografía tomada en 1952 inmortalizou un dos seus paseos pola Alameda xunto a Uxío Novoneyra e Manuel María. Agora, esa instantánea é eterna grazas ao traballo de Soledad Penalta, quen deu vida á imaxe con aceiro.

Esta escultura do dramaturgo e poeta galego Valle-Inclán está feita en bronce polo escultor César Lombera e atópase no paseo dos Leóns do parque da Alameda de Santiago desde xaneiro de 1999.
Trátase dunha escultura que representa á perfección a forma de ser do escritor, xa que o mesmo Valle-Inclán sentaba nese banco para admirar a Catedral cando vivía en Santiago. Moitas e moitos turistas aproveitan esta escultura para facerse unha foto co escritor e ademais admirar as vistas desde o mesmo lugar desde o que el o facía.
Como curiosidade: as lentes do escritor en bronce se soldan cada certo tempo ao ser periodicamente arrincadas polos actos de vandalismo.